Jcdvzbm

Карьхне (рузкс лапти) — кунардонь пингонь карьсембяльхть. Мокшетне, эрзятне маштсть карень кодама. Этнолокне мордовскяй карьть колга сёрмадыхть кода башка карьсембялень колга. Эсь лацонь ширекс мордовскяй карьти азондови ширемняста кодазь кодамась, трапециянь кодяма карьбрясь — крайса сяда тяйняня, меле цютькя келеми. Мордовскяй карьса ульсть ленгянь килькшт, куване нолневсть карьксне. Серес синь рузоннетнень коряс цють сяда алнянятольхгь. Карьхнень котцезь пяшень ленгяста, сяда шуроста — сялиень ленгяста. Ленгятнень ватксезь мапастонь вирьста, сят, кит эрясть вирть эзда ичкозе, якасть мянь 50 — 60 вайгяльбень вастс. Каренди ленгянь аноклама тушендсть семьянь - семьянь, тя улендсь майть песта — июнть ушетксста. Тя ёткть сяда тёждяль ленгянь ваткамась. Ленгат мишенкшневсть лесничестваса, базарса.

Карень котцема сяда сидеста озсесть атятне. Карень кодамс лама мезе пяк ашезь эряв: пеель, цёканцёр, шуфтонь колодка. Ленгятнень карень кодамда инголе лопафнезь ведьса 8 — 10 чаетт, тяфта синь сяда ляпомкшнесть, меле керсезь 1 — 2 см келеса ленгянява. Ленгятнень лангста равжа керть крксезь, меле ни ушеткшнесть карень кодама.

Карьть кодама ушеткшнезь кочкяряста. Пильгалдонь ваетть тиендезь кафта слойста, а лияета и колма слойста. Стакшинь карьть котцезь вете ленгяста, праздник шиннеть сисем, а то и кемонь ленгяста. Тяфтама каренди нолнесть еялиень ленгят. Мокшень карьхнень пряса булдомняль, атякшель.

Нят аф аньцек мазоптомкатольхть, атякшнень коряс шарьхкотькшнезь, кона карьсь види пильгонь, а кона кержи пильгонь. Кунардонь карьхнень эса ульсь нинге карь пула.Котцевсь ленгя пакш сязьгатань пула лаца. Кувапмоц карь пулоть улендсь 12 сантиметра, келец 2 — 3 сантиметрат. Карьсемста карь пулоть кепсезь пильге сяярти и тяфта ашкоткшнезь пракстаса. Тяфта карьсь сяда афоль прашенда канниенц пильгета. Тяфтама карьхть XX векть ушетксста каннекшнесть аватне праздник шиня.

Кяльвалсь[петнемс | править код]

1) В.Н.Белицер. "Мордвать народнай щамоц", Моску, 1973 к.

2) Энциклопедия «Мордвась» Саранск, 2006 к. 239 л.

Тя апак шумордак сёрматфкссь. Ули мяльце сонь петнеманза ди поладоманза? Лезтт!