Jcdvzbm

Kayini na Aberi
1 Adamu amenya Heva umugore wiwe e : Heva asama inda, avyara Kayini, araheza avuga ati: «Navyaye umuhungu mfashijwe n'Umukama.» 2 Heva amukurikiza mwenewabo Aberi. Aberi aba umwungere w'ibitungwa, Kayini na we aba umurimyi. 3 Haciye imisi, Kayini ahereza Umukama ishikanwa mu vyo yimbuye mu murima; 4 Aberi na we nyene ashikana ibitungwa akuye mu buriza f bw'ubusho bwiwe n'ibinure vyavyo. Umukama arashima Aberi n'ishikanwa ryiwe, 5 ariko ntiyashima Kayini n'ishikanwa ryiwe. Kayini biramushavuza cane, aca ariraburanirwa mu maso. 6 Umukama abwira Kayini ati: «Ni kuki ushavuye? Igituma wiraburaniwe mu maso ni iki? 7 Niwakora neza uzobura kuvyukirana? Ariko nutakora neza, igicumuro kibunze ku rugi kikugeramiye, ubwo wewe uragitsinda?» 8 Kayini avugana na murumunawe Aberi. Hanyuma bashitse mu gahinga, Kayini agwa kuri murumunawe Aberi aramwica. 9 Umukama abwira Kayini ati: «Murumunawe Aberi ari hehe?» Yishura ati: «Sindabizi. Mbaye umurinzi wa murumunanje?» 10 Asubizayo ati: «Wakoze iki? Amaraso ya murumunawe ariko aramborogera iyo ari mw'ivu. 11 Kuva ubu rero uravumwe kuri iyo si yasamye ngo inywe amaraso ya murumunawe asheshwe n'iminwe yawe. 12 Niwarima isi ntizokwongera kuguha ivyimburwa vyayo. Uzoba icangazi kiyerera kw'isi.» 13 Kayini abwira Umukama ati: «Icaha canje kirahambaye, kirandemereye cane. 14 Ko uyu musi unyirukanye kuri ubu butaka, ndakuvuye mu maso; nzoba icangazi kiyerera kw'isi, kandi uwuzonyubukako wese azonyica.» 15 Umukama amubwira ati: «Bibaye uko, Kayini niyicwa, azohorwa incuro indwi.» Umukama ashira ikimenyetso kuri Kayini, kugira ngo uwo bazohura ntamwice. 16 Kayini ava mu maso Umukama, aja kugerera mu gihugu ca Nodi, mu buseruko bwa Hedeni. Kuva kuri Kayini gushika kuri Enoshi 17 Kayini amenya umugore wiwe g , na we asama inda, avyara Hanoki. Kayini yubaka igisagara, acitirira umuhungu wiwe Hanoki. 18 Hanoki avyara Iradi, Iradi avyara Mehuyayeri, Mehuyayeri avyara Metushayeri, Metushayeri na we avyara Rameki. 19 Rameki yabira abagore babiri: umwe yitwa Hada, uwundi na we Tsira. 20 Hada avyara Yabari ari we yabaye se w'ababa mu nsago batunze amasho. 21 Murumunawe yitwa Yubari. Ni we yabaye se w'abavuzi b'inanga n'imyironge bose. 22 Tsira na we avyara Tubari Kayini, yacura mu mujumbu no mu vyuma ibikoresho vyose vy'ukurima. Mushiki wa Tubari Kayini yari Nahama. 23 Rameki abwira abagore biwe ati: «Hada na Tsira, nimwumvirize ijwi ryanje. Bagore ba Rameki, tega ugutwi amajambo yanje! Ego, narishe umugabo ndamuhora ko ankomerekeje, nica umwana ndamuhora ko anteye igipfupfuri. 24 Ni vyo! Kayini azohorwa incuro indwi, Rameki na we incuro mirongo indwi n'indwi!» 25 Adamu asubira kumenya umugore wiwe h , avyara umwana w'umuhungu, amwita Seti. Yibwira ati: «Imana yanshumbushije uwundi muhungu mu kibanza ca Aberi, kuko Kayini yamwishe.» 26 Seti na we avyara umuhungu amwita Enoshi. Kuva ubwo batangura kwambaza izina ry'Umukama.